Tharuwakata pem kalemi - තරුවකට පෙම් කළෙමි 2

කාමරය පෙර පරිදිමය. කාමරයේ ඇති බඩු බාහිරාදිය පෙර පරිදිමය. බිත්තියේ වූ අම්මාගේ සේයාරුවත් ඇඳ මත වූ විශාල ප්‍රමාණයේ බෝනික්කාත් පෙර පරිදිමය. වෙනස් වී ඇත්තේ තමා පමණක් නොවේදැයි අමායා ශෝකයෙන් සිතුවාය. ඇය ඇඳුම් බෑගය තුළ වූ ඇඳුම් සියල්ලම ඇද ඇඳ මතට දැමුවාය. බෑගය පතුලෙහි මීට කලකට පෙර නිහාරිගෙන් හා ස්වප්නාගෙන් ඇය ලද තිලිණය විය. අමායා පෙට්ටිය ගෙ සීරුවෙන් මේසය මත තබා පියන විවර කරත්ම එහි සිටි නළඟන නටන්නට වූවාය. එහෙත් ඒ පෙර මෙන් වේගවත්ව නොවේ. බැටරි බැස තිබුණෙන් මන්දගාමීව නැටූ නළඟන අවසානයේදී නතර වන අයුරු අමායා කඳුළු පිරි දෙනෙත් අතරින් බලා සිටියාය.