Yaaya Australia - සන්තිපරං by Chamminda Welagedara

පෙරදාක, වැහි බිත්තර පුපුරුවා ගෙන නොනවත්වාම පොළෝ මහීකාන්තාවගේ මූණ හුදු කරන්ඩ පටන් ගත්තු වැහිගම්පොළමුත්තා අන්තිමේට නැවතුණේ තිසා වැවත් ගැබ්බර කොරලා. තිසා වැවේ රළපනාවට වැදෙන දියරැල්ල හීංවට දියකැට ඉහළට විසික්ක කරන්ට ඇන්න. එදෙස බලා සිටි රණා දෙපා දොවාන ඉරිගේෂන් බංගලාව දිහාට ගියේ කාලෙකින් එන්ඩ බැරිවුණු හංදා සුදු මහත්තයා බලාන යන්ඩ. ජනේලයෙන් එළිය බලන කෙන්ට් දුටුවේ පෙරදා වට මහවැස්ස තෙමා දැමූ අතු අග රැඳී දිලිසි දිලිසී තිබෙන වැහි කැටය. හමා ආ මඳ සුළඟකින් ඒ වැහි බිඳු බිම විසිරී ගියේ ඒ මත රැඳුනු හිරු එළිය ද සමගමය.