Yaaya Australia - පරසතුරෝ by Jayasena Jayakody

උඩරට මහ කැරැල්ල යනු වාසියට කත් නොඅදින එතෙක් ඉතිරිව හුන් දහ දොළොස් දහසක් තරම් වූ අදීන සිංහලයින්ගේ නැගිටීමකි. සුද්දෝ ඔවුන් එකෙකු නොහැර පවුල් පිටින් ගම් පිටින් විනාශ කළහ. කැප්පැටිපොළලා, බූටාවේ රටේ රාළලා, කිවුලේ ගෙදරලා, ඇල්ලෙපොළ නිලමෙලා, පිළිමතලාවෙලා හා මඩුගල්ලෙලා රට වෙනුවෙන් දිවි පිදූහ. ඉහගම උන්නාන්සෙලා, වාරියපොළ මහ තෙරුන් වහන්සේලා, වධ කඳවුරුවල දුක් විඳ මළහ. ඒ අතර ඇහැලියගොඩ, එක්නැලිගොඩ, මහවලතැන්න හා මොල්ලිගොඩ යන ද්‍රෝහියෝ සුද්දන්ගේ පැත්ත ගෙන උන්ට කත් ඇද සිංහලේ සටන දීන ලෙස පාවා දුන්හ. ජාතික සටනකදී, මහ කැරැල්ලකදී බෙලිකැපුම් කන්නෝ අභිමාන අදීන හා අසහාය වීරයෝ ය. 1818 මහ කැරැල්ලේදී එවන් ශ්‍රේෂ්ඨ පුරුෂයන් නෑ සනුහර පිටින් විනාශ වී ගිය අතර, දේශ ද්‍රෝහියෝ තාන්න මාන්න යස ඉසුරු ලැබ යහතින් විරාජමාන වූහ. අද ද එවැන්නෝ මහ සපන්කම් කරති. අද කැප්පැටිපොළලාගෙන්, බූටාවේ රටේ රාළලාගෙන් පැවතෙන්නෙක් නැත.වාරියපොළ මහ තෙරුන්නාන්සේ වැන්නෙකුත් නැත.