Mage Kuludul Pemwathiya - මගේ කුලුඳුල් පෙම්වතිය

දැන් මට ජීවත් වෙනවානම් එය කළ හැක්කේ ප්‍රේමය වෙනුවෙන් ම පමණි. ඇය මගේ ප්‍රේමය නම් ඒ වෙනුවෙන් දස දහස් වතාවක් හුස්ම ගැනීමට පුළුවන. එසේ නොවන්නේ නම් මියැදීම හැර වෙනත් විකල්පයක් ඇතැයි මට දැන් නොසිතෙයි. ජීවිතය සමානයි ප්‍රේමය - වැඩි කිරීම අනාගතය නම්, බෙදීම, කළකිරීමෙන් අඩු කිරීම මරණය ලෙස මම සමීකරණය වී සිටිමි. මේ සංසාරේ ඈ ඉන්නවා නම් ඒ ගැන හිතමින් භවයෙන් භවය සැරි සරමින් හීන එකතු කිරීමට මට පුළුවන. ඒත් මේ හීන එකතු කිරීමේ සෙල්ලම සැබෑ නොවන්නේ නම් මගේ ජීවිතය නතර වන්නේ කොතැන දැයි සිතන හැම විටකම ඉරණම තීරණය කිරීමේ මගේ ජීවිත අයිතිය ඇයට සින්නක්කර පැවරී ඇතැයි සිතමි. බුක්ති විඳීමට මට ජීවිතයක් නැත්නම් සින්නක්කරව ඇයට ඔප්පුව පවරා දීමට පුළුවන.