Armoury Sealed - ආමරිය සීල්

ක්‍රමයෙන් අවට පරිසරය අඳුරු පැහැ ගනිමින් තිබිණ. බරපතල තුවාලකරුවන් තරමටම සාමාන්‍ය තුවාල ලැබුවන් පවා ඒ වන විට සිටියේ බොහෝ සෙයින් අඩපණවය. අඛණ්ඩ ලේ වහනයද, වේදනාවද ඔවුන්ව පෙළමින් තිබුනේ එකසමවය. තුවාලකරුවන්ගේ හැකිළුණු මුහුණු අතරින් වුවද අපේක්ෂා සහගත දෑස් දිළිසෙමින් තිබිණ. ඔවුන් සෑම අයෙකුගේම අවධානය නිරන්තරව යොමුවී තිබුණේ අහස දෙසය. ක්‍රමයෙන් හෙලිකොප්ටයක හඬ ඈතින් ඇසෙන්නට විය. එකඑල්ලේ දර්ශනය නොවූවද එය MI-17 වර්ගයේ යානාවක් බැව් හඳුනාගන්නට එහි සිටි කිසිවෙකුටත් අපහසු නොවීය. එහිදී තුවාල කරුවන් අතර යම් පමණකට හෝ හිස ඔසවා බලන්නට හැකි අයවළුන් සූදානම් ඉරියව්වකට පැමිණීමට යුහුසුළු වනු පෙනිණ. එසේම සිහිසුන් තරමට බරපතල තත්වයේ පසුවූවන් පවා හෙලිකොප්ටරයේ හඬ ඇසෙත්ම ඇසිපිය මදක් විවර කොට ජීවත්වීම උදෙසා වන සිය බලවත් උවමනාවේ තරම පෙන්වන්නට විය.