Abu Daruwo - අඹු දරුවෝ

“ඔන්න අම්මේ තෙමුවා. පුතා දෙන්න මගේ අතට” බබුන් කීවා ය. “කෑනොගහ ඉඳිං. පොඩි එව්වො වුණාම තෙත දාන්නෙ නැද්ද?” “ඔය රෙද්ද ගලෝල දෙන්න අම්මෙ නංගිට අව්වට දාන්න” බබුන් නැවත යෝජනා කරයි. “පිස්සු නැතිව හිටහං, මට ඕවා හුරුයි පුතා අතට ගන්න කොටම හිතුවා තෙත් කරයි කියල. තෙත නෙමෙයි, කැත දැම්මත් මං රෙද්ද ගලවන්නෙ නෑ. මේ වෙලුන් පොඩි කාලෙ දණගාගෙන ඇවිත් මගෙ බත් මැටි කෝප්පෙට එක දහ දොළොස් වතාවක් තෙත දාන්න නැතැයි. මං බත් ටික අහක දැම්මැයි?” ඉහ වහාගිය දයාවෙන් මව දෙස බලාහුන් වෙලුන් මහ ආඩම්බරයකින් යුතුව ගෙනා පැස ඔසවාගෙන නැන්දනිය වෙත ගොස් එය ඇය ඉදිරියේ තැබුවේ ය.