Yaaya Australia - සරු තණ බිම් සොයා by Charunnya Dehigama

ජීවිතයේ මිහිර මගෙන් ගිලිහෙන්නාක් මෙන් දැනෙන්නට පටන් ගෙන තිබිණි. බොහෝ විට මා පසු වූයේ වික්ෂිප්ත භාවයෙනි. නිතරම මට නිවස මතක් විය. නංගි, මල්ලී, අම්මා සහ අප්පච්චී පෙනෙන තෙක් මානයක නොමැතිව ගෙවන ජීවිතය ගැන මට මහා කලකිරීමක් දැනෙන්නට විය. මට පාසල් සමය සිහි විය. පුලුන් රොදක් සේ සැහැල්ලුවෙන් ගෙවූ දිවිය මගෙන් ගිලිහී ගොස් තිබිණි. එක් වරම වැඩ, වගකීම්වලින් ගහන ජීවිතයකට මම ඇද වැටී තිබිණි. එය මා ඔස්ට්‍රේලියාවේ ගෙවන්නට අපේක්ෂා කල ජීවිතය නොවුණු නිසා දිනෙන් දින මට එම ඒකාකාරී ජීවිතය නීරස විය.