Neth Path Than - නෙත් පත් තැන්

එම සොඳුරු සිහිනය ඇරඹුමේ සිටම විශ්වයත් සමග මහා සබැඳියාවක් පැවතියේ නොවේදැයි චමින්ද සිහිපත් කළේ නොසන්සුන් බවකින් යුතුවය. චමින්දත් පත්මාත් දියණිය මෙලොවට කැන්දන්නට මං හසර තැනුවේ මහා රාත්‍රියක ගල්ලෙන ඉදිරිපිට ගල් තලාවේ වැතිරීගෙනය. මහාමායා දේවිය සුදු ඇත් පැටවෙකු සිය කුසට ඇතුළු වනු සිහිනෙන් දුටු ලෙසින්ම පත්මා ද නයෙකු සිහිනෙන් දැක තිබිණි. ඉනික්බිතිව දිගින් දිගටම නයින් සිහිනෙන් දැකීම නිසා ඇය නයි හැවක් දකිද්දී පවා බිය වූවාය.