Mata Pera Siti Eya - මට පෙර සිටි ඇය

අවශ්‍යතාවයක් සපුරාලීමට මා හා නීත්‍යානුකූල බැඳීමක් ඇතිකරගත්ත ඔහුගෙන් ආදරය හා අවධානය බලාපොරොත්තු වීම කෙතරම් සාධාරණද? මම කල්පනා කළෙමි. ඔහුගේ හදවතේ හැමදාටම වෙන ගැහැණයක් සිටින වග එහි ඇති බරපතලකම පිළිබඳව නිශ්චිතව කරුණු විශ්ලේෂණය නොකර මා ඔහු හා විවාහ වීම පිළිබඳව මටම දොස් නගාගත්තෙමි. ඉතින් ගැටළුව ඇත්තේ ඔහු තුළ නොවේ. ගැටළුව ඇත්තේ මා තුළයි. මගේ බලාපොරොත්තු තුළයි. ඉමේෂ් කියන වර්ගයේ බැඳීමක් පිළිබඳව මම දැන නොසිටියෙමි. ආදරය මත නොව නීත්‍යානුකූල හිමිකාරීත්වය සමග පැමිණෙන යුතුකම් හා වගකීම්වලට සීමාවෙච්ච බැඳීමක් පවත්වා ගන්නෙ කෙසේද කියා මම නොදැන සිටියෙමි. මම ඔහු හා ආදරයෙන් බැඳෙන්න උත්සාහ කරමින් සිටියෙමි. මට ඔහුව සම්පූර්ණයෙන් මගේ කරගන්න අවශ්‍ය වුණි.