Mandaalokaya - මන්දාලෝකය

ගැහෙමින් සිටි ගැහැනියගේ සිරුරෙහි සෑම තැනකම පිළිස්සුම් දිය පට්ට දමමින් සහ ඒවා පුපුරා යමින් බලා සිටියදීම ඇය විරූපී වන්නට වූ අතර දියාරු මැට්ටෙන් කළ නොවියැලුණු පිළිරුවක් මෙන් සම අස්ථි තුළින් බේරී එල්ලෙමින් මා මෙතෙක් දැක ඇති භයානකම දසුන මගේ දෑස් ඉදිරියෙහි මවන්නට විය. මම ඈ වෙත දිවයන්නට සිතා සිටියද හදිසියේ සිදු වූ එම බියජනක විපර්යාසය නිසාවෙන් දෑත් දෙපා අක්‍රීයව ගිය කළෙක මෙන් හුන් තැනම ත්‍රස්තව බලා සිටියෙමි. තවත් එක් මිනිත්තුවක තරම් කාලයක් හෝ ගෙවී යෑමට මත්තෙන් කළු පැහැති දුමාරයක් බවට පත් වූ පෙර කී තැනැත්තියගේ සිරුර වාෂ්ප වී ගියේ, මා භීතියටත් වඩා උහුලා ගැනීමට පවා අපහසු කම්පනයකට පත් කරමිනි. මරුවිකල්ලෙන් දැඟලූ අවස්ථාවේදී ඇය වැටී සිටි තැන හෑරී ගිය වැල්ලෙහි වූ සටහන් සහ මිය යෑමට පෙර හැඳ සිටි ඇඳුම් පැළඳුම් නොවන්නට එහි කිසිවෙකු සිටි බවට තහවුරු කළ හැකි තරමේ ශරීර කොටස් කිසිවක් ඉතිරිව තිබුණේ නැත..