Gonano - ගොනානෝ

මිනිස්සු රැවටෙති. නැවත නැවතද රවටනු ලබති. මේ රැවටිල්ලේ කෙළවර හෝ සීමාවන් නොදැන සියල්ල සැබෑව යයි තමන් මත පටවනු ලබන මිථ්‍යාවන් ද අදහති. ස්වකීය පරිසරයට අනුගතවෙමින් සැනැසිල්ලේ ජීවත්විය හැකිව තිබියදී බොහෝවිට වංචාව හේතුවෙන් ම තමන් පමණක් නොව ස්වකීයයන් සමඟ ලොවම විනාශය කරා ගෙන යන රසායනික විනාශයට ද දායක වනු පෙනෙයි. ඒ වැරදි නිවැරදි කරගන්නට සිතන්නේ තමන් සමඟ සියල්ල කෙළවර කරා ඇදුණු ඉක්බිතිවය. එහෙයින් කිසිවක් වෙනස් කර ගන්නට ඔවුන්ට අවකාශයක් නැත. තමන් කරා එළැඹෙන මරණය ද සමඟ සියල්ල ගිල ගනිමින් විනාශවන පරිසරයට වගකිව යුතු ද තමන් බව අවසානයේ දී හෝ අවබෝධ කරගන්නේ නැත. මේ ශෝචනීය අවසානයේදී ද රැවටීමේ ඉමම, රැඳෙනු ඔහු ගොනා හෙවත් මුග්ධයා ලෙස හැඳින්වෙන්නට ඇත්තේ එහෙයින්ම විය යුතුය.