Agamehesiya - අගමෙහෙසිය

අහිංසක ගැමි යුවතියක් සිසිලස ඇති වනාන්තරයේ සිට කොන්ක්‍රීට් වනාන්තරයට සංක්‍රමණය වෙයි. ඇය එන්නේ, යස ඉසුරු පතාගෙන නොවේ. ජීවිතයේ අවම අවශ්‍යතා සපුරා ගන්නට, ජීවත්වන වට පිටාව තුළ අත දිග හරියේ සම්පත් නොවූ හෙයිනි. සිටු මැදුරක සේවය කරන මේ රූබර සාවිය ඩැහැ ගන්නට උකුස්සෙකු කල් යල් බලමින් සිටී. කොන්ක්‍රීට් වනාන්තරයේ පැල්පත් අඩවියේ වසන කවුඩෙක් සිටු මැදුර අවට සැරි සරයි. උකුස්සාට බිලි වී ජීවිතයෙන් සමුගන්නට යන සාවියගේ පිහිටට එන කවුඩා ඇය තම කැදැල්ල වෙත කැඳවාගෙන යයි. කැදැල්ලේ ඇති කැවිඩිය හා පැටවුන් දැක සාවිය බියෙන් මුසපත් වෙයි. සාවිය කැඳවාගෙන ආවේ, අගමෙහෙසිය තනතුරේ තබා ගන්නට දැයි අසමින් කැවිඩිය කවුඩා සමඟ සටන් වදී.