Ekama Handak Yata - එකම හඳක් යට

චේලකගේ සිත මහත් සේ ව්‍යාකූලව තිබිණි. හීන් මැණිකේ පැවසූ අන්දමට ඇයගේ දෙමවුපියන් ධනවතුන්ව සිට ඇත. මහා ධනස්කන්දයක් හිමි උගත්, රූමත් මෙන්ම ගුණ යහපත් කමින් පරිපූර්ණ යුවතියකට මෙවැනි අසරණ භාවයකට පත් වන්නට ඉඩ කඩ ඇත්ද? සුධාර පැමිණෙන්නේ කිනම් අපේක්ෂාවකින්ද? ඔහු විවාහකයෙකු නම් සංඛණි පිළිබඳව සොයා බැලීම ඔහුට කොපමණ කල් කළ හැකි වේද? ඒ කිසිවක් තමන්ට අයත් නොවන දේ බැවින් ඒ ගැන නොසිතා ඉන්නට ඔහු උත්සහ කළේය. එහෙත් වළාකුළකින් සඳ මෝදු වී එන්නා සේ සෑම සිතිවිල්ලකින්ම සංඛණී මතුව ආවේය. ඇයගේ අහිංසක, රූමත් මුහුණ දිවා කාලයේ ඔහු කියවන්නට උත්සහ කළ පොත්වල පිටු අතර ද, ඔහුගේ නිබන්ධනයේ වැඩ සඳහා පරිගණකය ක්‍රියාත්මක කළ විට එහි තීරයේ ද නිදා ගත් විට ඔහු දුටු සිහිනවලද විය.